ஐரோப்பிய ஒன்றியமும் கனடாவும் திங்களன்று Ottawa வை 150 பில்லியன் யூரோக்கள் ($244 பில்லியன்) மதிப்புள்ள ஐரோப்பிய பாதுகாப்பு நிதி திட்டமான SAFE இல் சேர அனுமதிக்கும் ஒப்பந்தத்தை அறிவித்தன.
இந்த புவிசார் அரசியல் ரீதியான கொந்தளிப்பான காலங்களில், குறுகிய கால அவசரம் மற்றும் நீண்ட கால தேவைகளை நாங்கள் நிவர்த்தி செய்வதால், ஒத்துழைப்பை அதிகரிக்கவும், பாதுகாப்பு இலக்குகளை அடையவும், சிறப்பாகச் செலவிடவும் இது (SAFE) ஒரு வழிமுறையாகும், என்று ஐரோப்பிய ஆணையத் தலைவர் Ursula von der Leyen மற்றும் கனேடிய பிரதமர் Mark Carney ஆகியோர் ஒரு கூட்டறிக்கையில் தெரிவித்தனர்.
இந்த திட்டத்தில் பங்கேற்க கனடாவுக்கு உரிமை அளிக்கும் ஒப்பந்தத்தை அவர்கள் வரவேற்றனர், இது எங்கள் ஆழமான ஒத்துழைப்பின் அடுத்த படியாகும், மேலும் ஐரோப்பிய ஒன்றியம் மற்றும் கனடாவிற்கு இடையில் பகிரப்பட்ட முன்னுரிமைகளின் அடையாளமாகும் என்றும் அழைத்தனர்.
உலகளாவிய பாதுகாப்பிற்கான ஒரு முக்கியமான நேரத்தில், எங்கள் தொழில்களுக்கு இடையே நெகிழ்ச்சியான பாதுகாப்பு விநியோகச் சங்கிலிகளை ஒன்றாக உருவாக்குவோம் எனவும் அவர்கள் கூட்டறிக்கையில் தெரிவித்துள்ளனர்.
ஐரோப்பாவிற்கான பாதுகாப்பு நடவடிக்கை திட்டமான SAFE, பங்கேற்கும் அங்கத்துவ நாடுகளுக்கு ஏனைய கூட்டாளர்களுடன் இணைந்து ஆயுதங்களை வாங்குவதற்கு சாதகமான விதிமுறைகளில் கடன்களை வழங்குவதை நோக்கமாகக் கொண்டுள்ளது.
SAFE இன் கீழ் கூட்டு ஆயுதத் திட்டங்கள் அவற்றின் கூறுகளில் குறைந்தபட்சம் 65 சதவீதத்தை ஐரோப்பிய ஒன்றியத்தின் 27 உறுப்பு நாடுகளுக்குள் தயாரிக்க வேண்டும், ஆனால் கனடா போன்ற கூட்டணி நாடுகளுக்கு விலக்கு அளிக்கப்படலாம் என எதிர்பார்க்கப்படுகிறது.
இதன் மூலம் Russia விலிருந்து அதிகரித்து வரும் இராணுவ அச்சுறுத்தலை எதிர்கொள்வதற்கு ஐரோப்பிய ஒன்றியம் அதன் பாதுகாப்புத் துறையை வலுப்படுத்தவும், ஐரோப்பாவிலிருந்து அமெரிக்கா விலகுவதைத் தவிர்க்கவும் முயற்சிக்கின்றமை புலனாகிறது.
