Greater Toronto பகுதி முழுவதும் பெட்ரோல் விலைகள் குறையத் தொடங்கியுள்ளன. ஆனால் விலைகள் நிலைபெற இன்னும் சில மாதங்கள் ஆகலாம் என்று நிபுணர்கள் எச்சரிக்கின்றனர்.
அமெரிக்க அதிகாரிகளும் Iran அதிகாரிகளும், அமெரிக்கா, Israel மற்றும் Iran ஆகியவற்றை உள்ளடக்கிய தற்போதைய மோதலை முடிவுக்குக் கொண்டு வருவதற்கான ஒரு கட்டமைப்பு ஒப்பந்தத்தை அறிவித்துள்ளனர். இதன் ஓர் அங்கமாக அமெரிக்க அதிபர் Donald Trump, Hormuz நீரிணையில் உள்ள இராணுவத் தடையை நிறுத்த உத்தரவிட்டுள்ளார்.
Canadians for Affordable Energy அமைப்பின் தலைவரான Dan McTeague அவர்களின் கருத்தின்படி, GTA பகுதி முழுவதும் உள்ள வாகன சாரதிகள் புதன்கிழமை முதல் பெட்ரோல் விலை லீற்றருக்கு 165 சதத்திலிருந்து 161 சதமாக குறையும் என எதிர்பார்க்கலாம்.
ஒரு நிபுணரின் கூற்றுப்படி, தற்போது ஒரு பரல் சுமார் 80 அமெரிக்க டாெலர் விலையில் வர்த்தகமாகும் கச்சா எண்ணெயின் விலை, எதிர்காலத்திலும் இதே அளவில் நீடிக்கும் என எதிர்பார்க்கப்படுகிறது. இந்த விலை குறைவதற்கான சாத்தியங்கள் சந்தையில் மிக குறைவாகவே காணப்படுகின்றன.
பல எண்ணெய் களங்கள் மோதலால் பாதிக்கப்பட்ட பகுதிகளில் அமைந்துள்ளன. அவற்றில் சில உடல் சேதத்தை சந்தித்துள்ளன. சில களங்கள் பாதுகாப்பு காரணங்களால் திட்டமிடப்பட்ட காலத்திற்கு முன்பே மூடப்பட்டுள்ளன. இதன் விளைவாக உலகளாவிய எண்ணெய் விநியோகம் குறையும் அபாயம் உருவாகி, கச்சா எண்ணெய் விலைகள் உயர்ந்த நிலையில் தொடர்வதற்கு அழுத்தம் ஏற்படுவதாக நிபுணர்கள் மேலும் கூறுகின்றனர்.
அந்தப் பகுதிகளில் எண்ணெய் உற்பத்தியை மீண்டும் தொடங்குவதற்கு கணிசமான காலம் ஆகலாம் என்று Dan McTeague கூறினார். மேலும், Hormuz நீரிணை வழியாக அனுப்பப்படும் எண்ணெய் அதன் இலக்கை அடையவும் பல மாதங்கள் ஆகக்கூடும் என்றார். ஒருவேளை ஆண்டுகள் கூட ஆகலாம் என்றும் அவர் தெரிவித்தார்.
எனவே, குறுகிய காலத்தில் பெட்ரோல் விலைகள் ஓரளவு குறைந்தாலும், பழைய நிலையான மற்றும் குறைந்த விலைகளுக்கு சந்தை விரைவில் திரும்பும் என எதிர்பார்க்க முடியாது என்பதே நிபுணர்களின் மதிப்பீடாகும்.
